Цагааны Баттогтохын дурсамж

1967 - 2023

Цагаан овогтой Баттогтох бол Монголын мэдээлэл технологи, боловсролын салбарыг орон нутагт хөгжүүлэхэд үнэтэй хувь нэмэр оруулсан, олон талын чадвартай, алсын хараатай, нэр хүндтэй багш, удирдагч хүн юм.

Баттогтох багштай анх уулзахад л түүний эрдмийн төлөөх чин сэтгэл, бүтээлч сэтгэлгээ, өөрийгөө бусдад зориулсан нэгэн болох нь мэдрэгддэг байсан.

1991 онд МУИС-ийг математикч-программист мэргэжлээр төгссөнөөс хойш тэрээр боловсролын салбарт тасралтгүй зүтгэж программ хангамжийн олон арван мэргэжилтэн, инженер, багш нарыг бэлтгэсэн.

Тэрбээр зөвхөн хичээл заахын хажуугаар, IT салбарт амьд хөгжлийг бий болгосон, орон нутгийн хэмжээнд бодит платформ, эх үүсвэр, хөгжлийн суурийг тавьсан анхдагчдын нэг юм. Түүний боловсруулсан 1000 мэдээлэл зүйн бодлоготой вэб сайтууд нь Монголын өнцөг булан бүрийн багш, сурагчдын сургалт, бэлтгэлд бодит дэмжлэг үзүүлдэг, цогц үнэгүй систем юм. Эдгээр нь:

Баттогтох багш олон улсын мэдээлэл зүйн олимпиадын багийг дасгалжуулж, Грек, Египет, Итали, ОХУ зэрэг улсад шавь нараа амжилттай хөтлөн оролцуулсан. Тэрээр Монгол Улсынхаа нэрийг өндөрт өргөсөн, дэлхийн түвшний мэдлэг, чадварыг орон нутгийн сурагчдад тэгш хүртээхийг зорьж ажилласан, тууштай, зоримог багш юм.

Баттогтох багшийн мэдээллийн технологийн боловсролд оруулсан бас нэгэн үнэтэй хөрөнгө оруулалт бол түүний Дархан-Уул аймагт 26-р сургуулийн мэдээлэл зүйн гүнзгийрүүлсэн ерөнхий боловсролын сургууль үүсгэн байгуулж, олон зуун хүүхдэд технологийн суурь боловсрол олгож чадсан.

Энэ нь тухайн үедээ орон нутагт анхдагч, инновацлаг санаачилга байсан бөгөөд мэдээлэл зүйн сургалтыг ерөнхий боловсролын түвшинд системтэй, гүнзгий түвшинд зааж эхэлсэн анхны жишиг болсон. Баттогтох багш энэ хөтөлбөрийг зөвхөн санаачлаад зогсохгүй, ангиудын хичээлийн хөтөлбөр, бодлогын сан, олимпиадын бэлтгэл зэрэг бүх шатны арга зүйн ажлыг удирдан хэрэгжүүлж байв.

Баттогтох багшийн заах арга зүй, сургалтын материалууд үргэлж шинэлэг, сурагчдын ойлгомжтой байдалд тулгуурласан байдаг. Тэрээр өгүүлбэртэй бодлого бодох тодорхой дүрслэл, хийсвэрчлэлийн “ДУГУЙН АРГА” шинэ аргачлалыг боловсруулж, зөвхөн өөрийн сургуулийн багш, сурагчдад бус, 500 гаруй багш, оюутнуудад түгээн дэлгэрүүлсэн нь түүний боловсролыг хөгжүүлэх чин эрмэлзлэлийг гэрчилнэ. Түүний нэрэмжит олимпиад Дархан-Уул болон Сэлэнгэ аймгийн бага ангийн сурагч, багш нарын дунд жил бүр уламжлал болон зохиогдсоор байгаа билээ.

Баттогтох багшийн оюуны хөдөлмөр зөвхөн мэдээлэл зүй, программчлалын хичээлд бус, боловсролын тогтолцоог шинэчлэх, нутаг орныхоо хөгжилд хувь нэмэр оруулах чиглэлээр өргөн хүрээг хамарч байв.

Тэрбээр Дархан хотод анхны хувийн телевизийг үүсгэн байгуулж, орон нутгийн иргэдийг мэдээллээр хангах, соёл боловсролыг дэмжих, иргэдийн дуу хоолойг хүргэхэд чухал хувь нэмэр оруулсан байдаг. Энэхүү телевиз нь тухайн үедээ шинэлэг контент, орон нутгийн бодит мэдээллийг хүргэдэг байсан бөгөөд энэ нь тухайн бүс нутагт мэдээллийн ардчиллыг хөгжүүлэх, иргэдийн мэдлэгийг дээшлүүлэх томоохон алхам болсон юм.

Түүнчлэн боловсролын салбарт тэрбээр Дархан хотод Санхүү, бүртгэлийн чиглэлээр мэргэшсэн дээд боловсролын сургууль үүсгэн байгуулж, нягтлан бодох бүртгэл, санхүүгийн чиглэлээр мэргэжилтэн бэлтгэх суурийг тавьсан. Мандах их сургуулийн Дархан-Уул аймаг дахь салбар сургуульд суралцагчид төдийгүй багш нар хүртэл түүний боловсруулсан хөтөлбөр, удирдлагын арга барилаас суралцаж, өдгөө улс орон даяар ажиллаж буй чадварлаг мэргэжилтнүүд болж өсч өндийсөн юм.

Баттогтох багш бол Монгол Улсын боловсролын салбарын хөгжлийн үнэт эрдэнэ юм. Түүний үлгэр жишээ хөдөлмөр, хүнлэг чанар, оюуны хөрөнгө оруулалт хэзээ ч мартагдахгүй, үе үеийн шавь нарын зүрх сэтгэлд мөнхөд дурсагдана.